«Реал Мадридтің» бразилиялық шабуылшысы Эндрик маусымды франциялық «Лион» клубында жалғастырады.
Фабрицио Романоның мәліметіне сәйкес, «Реал Мадрид» пен «Олимпик Лион» 18 жастағы шабуылшыны жалға беру жөнінде келісімге келді. Келісім 2026 жылдың маусымына дейін есептелген және сатып алу құқығын қарастырмайды. Жалдау мерзімі аяқталған соң футболшы Мадрид клубына қайта оралады.
Шартқа сәйкес, «Лион» ойыншының жалақысының 50 пайызын өз мойнына алады. Сонымен қатар келісімде Эндрикке француз клубының негізгі құрамында белгілі бір матчтарға қатысуына кепілдік беретін арнайы тармақ бар. Биылғы маусымда шабуылшы «Реал Мадрид» сапында алаңға сирек шықты: барлық турнирлерде үш кездесуге қатысып, барлығы 99 минут ойнады, бірақ гол да, нәтижелі пас та тіркей алған жоқ.
