"Ордабасы" ауқымды жобаны қолға алмақ

“Ордабасының” серпілісіне не себеп?

Команданың биылғы қарқыны, клуб ішіндегі өзгерістер мен алдағы жоспарлар туралы “Бірінші болдың” студиясында арнайы әңгіме өрбіді. Бағдарламада “Ордабасы” клубының президенті Дархан Қызайбай мен клуб амбассадоры Бейбіт Әлібеков қонақ болды.

Спикерлер шымкенттік клубтағы жаңа бағыттар, маркетингтік жобалар, жанкүйерлермен жұмысты күшейту және қала тұрғындарының футболға қызығушылығы туралы айтып берді.

Шымкентте футбол қалашығы пайда болуы мүмкін

Клуб басшылығының жоспары тек негізгі команданың нәтижесімен шектелмейді. “Ордабасы” Шымкентте футбол инфрақұрылымын дамытуға ерекше көңіл бөліп отыр. Соның ішінде қалада футбол қалашығын салу мәселесі де күн тәртібінде тұр.

Мұндай жоба жүзеге асса, ол балалар футболын дамытуға, жас ойыншыларды жүйелі түрде дайындауға және Шымкентті елдегі маңызды футбол орталықтарының біріне айналдыруға мүмкіндік береді.

Бейбіт Әлібеков “Ордабасыда” қандай қызмет атқарады?

Бағдарлама барысында Бейбіт Әлібековтің клубтағы рөлі де сөз болды. Ол «Ордабасының» амбассадоры ретінде клубтың имиджін күшейтуге, жанкүйерлермен байланысты арттыруға және футболды бұқаралық деңгейде насихаттауға үлес қосып жүр.

Әлібековтің айтуынша, футбол клубы тек алаңдағы ойынмен ғана шектелмеуі керек. Жанкүйермен байланыс, медиа, маркетинг және клуб мәдениеті де қазіргі футболдың маңызды бөлігіне айналған.

Сұхбатта трансферлік саясат та назардан тыс қалған жоқ. Клуб өкілдері команда құрамын күшейту, легионерлердің рөлі және Қазақстан Премьер-лигасындағы бәсекелестік деңгейі туралы пікір білдірді.

“Ордабасы” алдағы трансферлік кезеңге дайындықты бастап кеткен. Команда чемпиондық жарыста тұрақты өнер көрсету үшін құрам тереңдігін арттыруды маңызды санайды.