Әлем чемпионы ҚПЛ-ге ауысуы мүмкін
Испаниялық футболшы Қазақстанның оңтүстігіндегі клубтардың біріне ұсынылғаны хабарланды.
Испания құрамасының бұрынғы ойыншысы Хуан Мата мансабын Қазақстанда жалғастыруы мүмкін. 38 жастағы тәжірибелі жартылай қорғаушы қазіргі уақытта Австралия чемпионатында өнер көрсетеді.
AmanVIBE дереккөзіне сүйенген ақпаратқа сәйкес, әзірге футболшының нақты қай клубқа ұсынылғаны және келіссөздердің қай деңгейде жүріп жатқаны белгісіз.
Қазір "Мельбурн Виктори" сапында ойнайды
Хуан Мата қазіргі уақытта австралиялық "Мельбурн Виктори" клубының намысын қорғайды.
Өткен маусымда испаниялық хавбек Австралия чемпионатында 25 матч өткізді. Ол бұл кездесулерде 5 гол соғып, 13 нәтижелі пас берді.
Дереккөз мәліметінше, ықтимал трансфердегі негізгі қиындық — уақыт мәселесі.
Хуан Мата жаңа клубқа тек 2026 жылдың соңында ғана қосыла алуы мүмкін. Бұл жағдай Қазақстан клубы үшін келіссөз барысына әсер етуі ықтимал.
Мата — Әлем және Еуропа чемпионы
Хуан Мата өз буынындағы ең атақты испаниялық футболшылардың бірі саналады.
Ол Испания құрамасы сапында 2010 жылғы әлем чемпионатын және 2012 жылғы Еуропа чемпионатын жеңіп алған.
Клубтық деңгейде Хуан Мата "Валенсия", "Челси", "Манчестер Юнайтед" және "Галатасарай" сапында өнер көрсетті.