Қазақстандық талантқа Испания Швейцария клубтары қызығушылық танытты

Қазақстандық жас шабуылшы Жасұлан Әмірдің болашағына қатысты жаңа ақпарат шықты. "Ордабасы" өкілі Бейбіт Әлібеков футболшыға шетелден ұсыныстар бар екенін мәлімдеді.

Әмір Ла Лигаға ауысуы мүмкін бе?

YouTube-тегі "Бизнес-Ниндзя" арнасына берген сұхбатында Бейбіт Әлібеков Жасұлан Әмірге Испаниядан қызығушылық бар екенін айтты.

"Әмір, бәлкім, Ла Лигаға ауысуы мүмкін. Оның үстіне бізге ұсыныстар түсіп жатыр. Рас, әзірге толық біз күткендей емес", — деді ол.

Әлібеков нақты испаниялық клубтың атауын білмейтінін, бірақ Испаниядан ұсыныс бар екенін жеткізді.

"Базель" мен MLS клубтары да қызығушылық танытқан

"Ордабасы" өкілінің айтуынша, Жасұлан Әмірге Швейцарияның "Базель" клубынан да ұсыныс түскен.

Сонымен қатар футболшыға АҚШ-тың MLS лигасынан және Бельгия клубынан қызығушылық бар.

"Мен клубты нақты білмеймін, шынымды айтсам, бірақ Испаниядан ұсыныс бар. "Базельден" ұсыныс бар, MLS-тен бар, Бельгия клубынан да ұсыныс түсті. Агент испаниялық клубтан ұсыныс бар екенін айтты. Біз сөйлесуді бастадық, бірақ әзірге мұның бәрі тек әңгіме деңгейінде", — деді Әлібеков.

Әмір ересектер футболына 2025 жылы шықты

Жасұлан Әмір "Ордабасы" сапында ересектер деңгейіндегі дебютін 2025 жылдың наурызында өткізді.

Содан бері жас шабуылшы шымкенттік клубтың негізгі құрамына жақындап, Қазақстан Премьер-лигасында көзге түсе бастады.

Ал Қазақстан ұлттық құрамасы сапындағы алғашқы ресми матчын 2026 жылғы 9 маусымда өткізді.

Ол Венгрияға қарсы жолдастық кездесуде алаңға шығып, бірден нәтижелі паспен көзге түсті. Бұл матчта Қазақстан 1:3 есебімен жеңілді.

Биылғы маусымдағы статистикасы

Қазіргі маусымда 19 жастағы шабуылшы нәтижелі ойынымен ерекшеленіп жүр.

Жасұлан Әмір 7 гол соғып, 3 нәтижелі пас берді. Ал ҚПЛ-дегі дебюттік 2025 маусымында ол 13 матчқа қатысып, 1 нәтижелі пас жасаған еді.