"Қайрат" – "Андерлехт" матчы алдында Алматыдағы Орталық стадионның көгалы қандай күйде?

Стадиондағы қалпына келтіру жұмыстары

Алматы қаласының Спорттық нысандар дирекциясының мәліметінше, Канье Уэсттың шоуынан кейінгі күні, яғни 16 тамыздан бастап Орталық стадионда демонтаж жұмыстары жүргізілген. Одан кейін мамандар табиғи көгалды қалпына келтіруге арналған жоспарлы агротехникалық шараларға кіріскен.

Дирекция өкілдерінің айтуынша, 19 тамыздағы жағдай бойынша алаңда бірнеше бағытта жұмыс қатар жүргізілуде.

Атап айтқанда, мамандар шөпті шабу, аэрация, топырақты тесу, қосымша шөп тұқымын себу, құмдау, күндізгі және түнгі күшейтілген суару жұмыстарын атқарып жатыр. Барлық шара табиғи төсемнің қазіргі жағдайы мен 20 тамызда өтетін халықаралық матчты ескере отырып жүргізілуде.

Алаңның жағдайы тұрақты бақылауда

Спорттық нысандар дирекциясы футбол алаңының жағдайы күн сайын бақылауда екенін мәлімдеді. Арнайы мамандар газонның сапасын сақтау және матчқа барынша жақсы күйде жеткізу үшін қажетті күтім жұмыстарын жалғастырып жатыр.

Еске салайық, 20 тамызда Алматыда “Қайрат” Бельгияның “Андерлехт” клубын қабылдайды. Бұл кездесу УЕФА Еуропа лигасының плей-офф кезеңіндегі алғашқы матч болмақ. Сондықтан Орталық стадионның газонының жағдайы алматылық клуб үшін ғана емес, алдағы халықаралық ойынның ұйымдастырылуы тұрғысынан да маңызды.