"Андерлехт" футболшылары Алматыға келген жанкүйерлерге ерекше сый жасады

Жанкүйерлер Алматыға дейін ұзақ жол жүріп келді

Бельгиялық команданың Алматыдағы кездесуін қолдау үшін небәрі 18 жанкүйер Қазақстанға арнайы сапарлаған. Walfoot.be мәліметінше, Брюссельден Алматыға дейінгі әуе сапары шамамен сегіз сағатқа созылған.

Жанкүйерлер алыс жол мен қымбат әуе билеттеріне қарамастан сүйікті командасын қолдаудан бас тартпаған. Нәтижесінде олардың сапары сәтті аяқталды. "Андерлехт" Алматыда сенімді жеңіске жетті.

Футболшылар ойын жейделерін сыйлады

"Қайратқа" қарсы матч аяқталғаннан кейін бельгиялық клубтың ойыншылары трибунада финалдық ысқырыққа дейін қалған 18 жанкүйеріне өздерінің жейделерін табыстады.

Бельгиялық басылым мұны команда тарапынан жанкүйерлерге көрсетілген алғыс пен құрметтің белгісі деп бағалады.

Сапардың екі бағытын есептегенде жанкүйерлерге әуеде жалпы 15 сағаттан астам уақыт өткізуге тура келген.

Бір қызығы "Андерлехттың" Алматыдағы матчқа өтініміне 23 футболшы енген, ал Бельгиядан келген жанкүйерлер саны 18 ғана болған. Сондықтан кейбір ойыншылар жейдесін өзінде қалдырған немесе жекелеген жанкүйерлерге бірнеше жейдеден бұйырған болуы мүмкін.

Алматыдағы сенімді жеңіс

Еске салайық, Еуропа лигасының плей-офф кезеңіндегі алғашқы матчта "Андерлехт" алматылық клубты 3:0 есебімен жеңді.

Қарымта кездесу 27 тамызда Брюссельде өтеді. Екі матч қорытындысы бойынша жеңіске жеткен команда Еуропа лигасының келесі кезеңіндегі жолын жалғастырады.