Қазақстан футбол федерациясының (ҚФФ) президентінің кеңесшісі Нұрсұлтан Құрман ұйымдағы қаржылық аудиттің жүргізіліп жатқанын мәлімдеді. Бұл туралы ол "Alim Live" YouTube арнасына берген сұхбатында айтты.
Нұрсұлтан Құрманның айтуынша, ҚФФ-ның өткен маусымдардағы қаржы шығындары бойынша аудит жүргізілген. Қазір бұл жұмыс ауқымды тексеріспен жалғасып жатыр, оған ҚР Бас прокуратурасы да тартылған.
"Аудит қорытындылары белгілі, ал толық есеп алдағы екі ай ішінде жарияланады. Бірақ ең маңызды шешімдердің бірі — QFL лицензиясын Қазақстан футбол федерациясына қайтару. Жақын арада бұл мәселе бойынша жаңа деректер белгілі болады", — деп атап өтті Құрман.
ҚФФ-дағы қаржылық бақылаудың күшеюі мен QFL лицензиясының федерацияға қайтарылуы елдегі футбол жүйесіне елеулі өзгерістер әкелуі мүмкін. Сарапшылар бұл шешім футбол саласының ашықтығын қамтамасыз етуге және қаржының тиімді жұмсалуына ықпал етеді деп болжайды.
