Қазақстандық футболда болып жатқан өзгерістер көптеген сұрақ тудырады. "Ертіс" клубының бас бапкері Қайрат Нұрдәулетов мемлекеттік қаржыландырудан бас тарту және оның салдары туралы пікірін білдірді.
Қайрат Нұрдәулетов мемлекеттік деңгейде қабылданған шешімдердің Қазақстан футболына әсері туралы былай дейді:
"Футболдағы соңғы өзгерістер оның болашағы туралы ойлануға мәжбүрлейді. Әсіресе легионерлерді мемлекеттік қаржыландырудан бас тарту – маңызды қадам болды. Дегенмен бұл шешім жан-жақты сарапталды деп айта алмаймын. Себебі егер тек спорттық тұрғыдан алып қарасақ, легионерлердің санын азайту немесе олардан толық бас тарту чемпионат деңгейінің төмендеуіне әкелуі мүмкін."
Маманның айтуынша, бұл динамика қазірдің өзінде байқалады. Ол биылғы маусымдағы командалардың деңгейі былтырғымен салыстырғанда әлсірегенін атап өтті.
"Легионерлердің бәсекелестікке қосатын үлесі өте жоғары. Олар жергілікті футболшыларға тәжірибе алмасуға көмектесіп, ойын сапасын көтереді. Жас қазақстандық ойыншылар өсіп келеді, бірақ олармен қатар мықты шетелдік футболшылар да ойнауы тиіс. Бұл жас буынның дамуына оң әсер етеді."
Қайрат Нұрдәулетов Қазақстан футболында радикалды өзгерістер жасауға әлі ерте екенін айтады. Оның пікірінше, мүлде бас тартқаннан гөрі басқа балама шешімдерді қарастыру керек:
"Мысалы легионерлер санын 6-7 ойыншымен шектеу арқылы қалған орындарды қазақстандық футболшылармен толтыруға болады. Бұл шетелден сапалы ойыншыларды шақырып, Қазақстан футболына шынайы пайда әкелетіндей жағдай жасауға мүмкіндік береді. Бізге нақты позицияларда сапалы ойыншылар жетіспейді. Сондықтан легионерлердің болуы маңызды."
Маман ортақ шешімдер қабылдауда әртүрлі спорт салаларының өкілдерімен пікір алмасу қажеттігін айтады.
"Футболдағы өзгерістер тек Қазақстанның ішкі чемпионатына ғана емес, халықаралық деңгейдегі беделіне де әсер етеді. Сол себепті, мұндай маңызды шешімдерді түрлі спорт түрлерінің мамандарымен бірге талқылау қажет."
Қайрат Нұрдәулетов бұл пікірін жеке Instagram парақшасында жариялады.
