Қазақстандық жартылай қорғаушы Акмаль Бахтияров Ресейдің екінші лигасындағы "Алтын" тобының үшінші тур ойынында Астраханьның "Волгарь" клубына жеңіс әкелді. Оның командасы Пятигорскінің "Машук-КМВ" клубымен кездесті.
Бахтияров ойынға 64-минутта есеп 1:1 болған сәтте алаңға шықты. Тартысты матчта 86-минутта ол қарсылас команда қақпасына ғажайып гол соқты.
Қазақстандық футболшы айып алаңы алдында бірден үш қорғаушыны алдап өтіп, допты қақпаның тоғыздығына дәл бағыттады. Осылайша, есеп 2:1 болып өзгерді. "Волгарь" матч соңына дейін басымдықты сақтап қалды.
Бахтияров бұған дейін Қазақстан жастар құрамасында өнер көрсеткен.
