Бразилия футзалының тірі аңызы Фалькаоның ұлы — Энцо Мендес Қазақстан Премьер-Лигасында өнер көрсетуі мүмкін. Қазір 22 жастағы қорғаушы "Окжетпес" клубымен келіссөздер жүргізіп жатыр.
Энцо Мендес қаңтарда "Елімай" клубының қатарына қосылу үшін келген. Бірақ сынақ мерзімінен өте алмай, команда құрамына енбеді. Бұл жағдай біршама дауға ұласқан еді. Соған қарамастан жас ойыншы Қазақстанда қалуға ниетті болып отыр.
Энцо кәсіби мансабын Бразилияның "Деспортиво U-20" және "Лондрина-ПР" клубтарында бастаған. Сонымен қатар Португалияның "Портимоненси U-23" және "Лейшойнш U-23" командаларында да өнер көрсетті.
Энцо – футзалдан әлемнің екі дүркін чемпионы, төрт мәрте әлемнің үздік ойыншысы атанған Фалькаоның ұлы. Әкесінің даңқты жолын жалғастыру оңай болмаса да, жас ойыншы өзін дәлелдеуге бар күшін салуға дайын.
