Оқыс оқиға Перу Кубогы аясындағы матч кезінде болды.
Перу Кубогы аясында өткен матчта күтпеген жағдай орын алды: футбол төрешісі ашуға булыққан жанкүйерді беттен теуіп, есінен тандырды.
Перу Кубогының кезекті кезеңінде "Спорт Уакилья" мен "Магдалена СЕДЕК" клубтары арасындағы матчта оқыс оқиға болды. Ойын барысында бір жанкүйер алаңға жүгіріп шығып, төреші Луис Алегриге қарай бет алады. Жанкүйердің қолында бөтелке болған және ол агрессивті қимылдар көрсеткен.
Оқиғаның бейнежазбасында көрініп тұрғандай, төреші қауіптің алдын алып, шабуылдаушы жанкүйердің бетіне аяғымен соққы жасап, оны жерге құлатты. Жанкүйер сол жерде естен танып түсті.
Оқиғадан кейін жағдай ушығуы мүмкін еді. Себебі төреші мен бір ойыншы арасында жанжал басталып кетті. Алайда, ойыншылар мен қызметкерлер дер кезінде жағдайға араласып, қақтығысты тоқтатты. Матч әрі қарай жалғасып, "Спорт Уакилья" клубы 2:1 есебімен жеңіске жетті.
Бұл — спорт алаңындағы алғашқы жанжал емес. Бұған дейін АҚШ-тағы NBA матчында да ұқсас жағдай тіркелді. "Миннесота Тимбервулвз" пен "Детройт Пистонс" арасындағы ойында Айзея Стюарт пен Донте Дивинченцо арасында қақтығыс болып, ол жаппай төбелеске ұласқан болатын.
