Бразилия ұлттық құрамасының аңызға айналған капитаны, екі дүркін әлем чемпионы Кафу Алматыда болды.
Бразилиялық футболшы Қазақстанға алғаш рет келіп отыр. Ол елдің табиғатына, халқына және ұлттық ерекшеліктеріне тәнті болғанын жасырмады. Бұл туралы Meta-ratings.kz порталы жазады.
“Мен мұнда бірінші ретпін және Қазақстанға келгеніме өте қуаныштымын. Маған бәрі ұнады: атмосфера, адамдар, тағам. Шымбұлақта болдық. Қар, табиғат, көріністер — бәрі таңғажайып. Мені өте жылы қарсы алды. Бұл үшін алғысым шексіз”, — деді Кафу.
Кафу Шымбұлақта киген қазақы оюмен өрнектелген свитер көпшіліктің назарын аударды. Аңыз спортшы бұл әрекеттің жай сән емес, шынайы ниеттен туған қадам екенін айтты:
“Мен бұл ұлттық өрнегі бар свитерді арнайы кидім. Бұл — сіздердің мәдениеттеріңізге деген құрметімнің белгісі. Маған Қазақстан қатты ұнады. Адамдарыңыз, дәстүрлеріңіз, қарым-қатынастарыңыз — бәрі ерекше. Бұл — жүректен шыққан әрекет”, — деді ол.
