Жуырда президенттер тиісті келісімшартқа қол қойды.
Орталық Азияның футбол картасында жаңа кезең басталмақ. Қырғызстан мен Тәжікстан президенттері республикалардың футбол чемпионаттарын біріктіруге келісті. Бұл туралы АЗИЯ-СПОРТ телеграм арнасы хабарлады.
Худжанд қаласында өткен екіжақты кездесуде Қырғызстан мен Тәжікстан басшылары "Мәңгілік достық декларациясына" қол қойып қана қоймай, футбол саласындағы ынтымақтастықты да кеңейту туралы шешім қабылдады. 2025 жылдан бастап Қырғызстан мен Тәжікстанның үздік футбол клубтары КТО-Лига деп аталатын жаңа біріккен чемпионатта бақ сынайды. Әр елден 8 командадан тұратын бұл лига — Орталық Азияда теңдесі жоқ бастама болмақ.
Біріккен лига құру арқылы аймақтық футбол деңгейін көтеру көзделіп отыр. Сонымен қатар, бұл қадам 2023 жылы Өзбекстанмен бірлесіп берілген Азия кубогы–2031 өтінімінің сәтті болуына ықпал етуі мүмкін. Жаңа формат аймақтағы футболды кәсібилендіру мен инфрақұрылымды жақсартуға серпін бермек.
Бұл шешім Орталық Азия елдері арасындағы достық пен өзара сенімнің жаңа деңгейге көтерілгенін көрсетеді. Футбол тек спорт қана емес, халықтар арасындағы мәдени, әлеуметтік байланысты нығайтатын күшке айналуда.
