"Ордабасы" клубының жанкүйерлері ҚПЛ-дың алғашқы турындағы сәтсіз нәтижелерге байланысты наразылықтарын ашық білдірді. Үшінші турдан кейін команданың турнир кестесінің соңында тұрғаны жанкүйерлердің ашуын туғызды.
Қазақстан Премьер-лигасының үшінші турында “Ордабасы” өз алаңында “Қызылжармен” тең ойнап (0:0), маусымдағы үшінші кездесуін голсыз аяқтады. Қазір шымкенттік команда небәрі екі ұпаймен “Қайсар”, “Ұлытау”, “Жетісу” және “Қызылжармен” турнир кестесінің төменгі жағында тұр. Бірақ “Ордабасы” — маусымда бірде-бір гол соқпаған жалғыз команда.
“Қызылжармен” болған тең ойыннан кейін шымкенттік жанкүйерлер футболшыларға ашық наразылық білдіріп, олардың ойынын сынға алды. Әлеуметтік желілерде де пікірлер легі толастаған жоқ:
“Қайда біздің жұлдыздар? Эвертон, Имнадзе, Кайоде — шабуылда мүлде көрінбейді. Командада нақты шабуылшы жоқ”
“Қарттар мен легионерлерде мотивация жоқ, біздің Зико мен Сары одан артық”
“Неге ойыншылардың 80 пайызы легионер?”
Қыс айында “Ордабасы” бас бапкер ретінде молдовалық маман Андрей Мартинді шақырған болатын. Оның ұсынысымен Молдова чемпионатынан бірнеше ойыншы қосылды: Дмитрий Челядник, Виктор Мудрак, Рашид Абубакар және Жоао Паулиньо.
Сонымен қатар Шымкент қаласы әкімінің аты аталған даулы видеодан кейін команданың капитаны әрі көшбасшысы Асхат Тағыберген клубтан кеткені белгілі.
Қазіргі құрамның жасақталуы көңіл көншітпейтінін жанкүйерлер де, сарапшылар да ашық айтуда. Трансферлік терезе екі күннен кейін жабылады, ал “Ордабасы” дағдарыстан қалай шығады – белгісіз. Осы жағдайда Андрей Мартиннің бапкерлік біліктілігі мен клуб тәрбиеленушілерінің рөлі шешуші болуы мүмкін.
Айта кетейік, клуб түлегі Нұралы Бағдәулет жақында негізгі құраммен алғашқы келісімшартқа қол қойып, QJ League 2024 маусымының үздік сұрмергені атанды.
Клуб Еурокубок аймағына таласа ма, әлде ҚПЛ-де қалу үшін күресе ме — оны алдағы бес ойын анықтайды:
5 сәуір: “Астана” – “Ордабасы”
19 сәуір: “Ордабасы” – “Жетісу”
27 сәуір: “Ордабасы” – “Тұран”
3 мамыр: “Атырау” – “Ордабасы”
11 мамыр: “Ордабасы” – “Қайсар”
