Футболдан Әзербайжан кубогының жартылай финалында "Нефтчи" мен "Сабах" арасындағы алғашқы матч Баку қаласында өтті. Бұл кездесуде қазақстандық қақпашы Стас Покатилов басты қаһарманға айналды.
11-минутта "Нефтчи" қорғаушысы Азер Салахлы өз қақпасына гол соғып алды. 21-минутта бакулық команда сапындағы Юри Матиас пенальтиден кейін допты қайта теуіп, есепті теңестірді. Айта кету керек, алғашқы соққыны қазақстандық қақпашы Стас Покатилов сәтті қайтарды. Бірақ доп серпіліп кеткен соң шабуылшы мүмкіндікті пайдаланды.
Ойын тағдырын 52-минуттағы Павол Шафранконың голы шешті. Ол "Сабахқа" 2:1 есебімен жеңіс сыйлады. Покатилов толық 90 минут ойнап, бірнеше қауіпті сәттерде қақпасын аман алып қалды.
Қарымта кездесу 23 сәуірде Масазыр қаласында өтеді. Еске салсақ, Әзербайжан кубогының қазіргі иегері — "Қарабах" командасы саналады.
