19 жастағы Александр Ким NAHL лигасының жеңімпазы болды.
Қазақстандық шабуылшы Александр Ким өнер көрсететін "Бисмарк Бобкэтс" командасы АҚШ-тың жетекші жастар хоккей лигасы – NAHL чемпионатының жеңімпазы атанды. Финалдық матчта олар "Лоун Стар Брамас" клубын 4:2 есебімен тізе бүктіріп, Робертсон Кубогын жеңіп алды.
Финалдық кездесуде Александр Ким командасына маңызды үлес қосты. Ол бір шайбаның авторы атанды. Бұл шабуылшы үшін ерекше сәт болды. Себебі маусым бойы көрсеткен еңбегі дәл осы шешуші ойында нәтижесін берді.
Александр Ким NAHL лигасында 44 матч өткізіп, 28 (17 гол + 11 пас) ұпай жинаған. Ал плей-офф кезеңінде 13 кездесуге қатысып, 7 (4+3) ұпай еншіледі. Бұл көрсеткіштер оның тұрақты әрі сенімді ойыншы екенін дәлелдейді.
