Хоккейден Қазақстан құрамасының әлем чемпионатындағы соңғы матч ел үмітін ақтамады.
Олег Болякиннің шәкірттері B тобындағы соңғы матчта Швейцарияға қарсы шықты. Ойын барысы тартысты өтті. Бірақ сәттілік Швейцария жағында болды.
Аркадий Шестаков 16-минутта есеп ашып, жанкүйерлер үмітін оятты. Бірақ екінші кезеңнің соңында швейцариялықтар басымдықты пайдаланып, Кевин Фиала 40-минутта есепті теңестірді.
Шешуші үшінші кезеңде Свен Андригетто (48') тағы бір басымдықты нәтижеге айналдырып, Швейцарияны алға шығарды. Матчтың соңғы минуттарында Андреас Амбюль (58') мен Дамьен Риат (59') қорытынды нүктені қойып, есепті 4:1-ге жеткізді.
Турнир барысында Қазақстан небәрі 3 ұпай жинап, соңғы орынға тұрақтады. Бұл нәтиже ел құрамасының элиталық дивизионмен қош айтысуына себеп болды.
Қазақстан құрамасы 2019 жылы Астанада өткен бірінші дивизион чемпионатында жеңіске жетіп, элитаға қайта оралған. Содан бері ел құрамасы қатарынан бес біріншілікке (2021, 2022, 2023, 2024, 2025) қатысты. 2020 жылы турнир COVID-19 пандемиясына байланысты өткізілмеді.
Осы кезең — Қазақстан хоккейі тарихындағы ең ұзақ элитадағы сапар. Бұған дейінгі рекорд — 2004, 2005 және 2006 жылдардағы үш жылдық қатысу болатын.
