Шайбалы хоккейден әлем чемпионатында Қазақстан құрамасы алтыншы ойынында АҚШ-қарсы ауыр жеңіліске ұшырады. Турнирдің басты фавориттерінің бірі саналатын америкалықтар 6:1 есебімен жеңіске жетті.
Ойынның алғашқы жиырма минуты нәтижелі соққысыз аяқталды. Қазақстан қорғаныста сауатты әрекет етіп, АҚШ шабуылдарын сәтті тойтарып отырды. Бірақ үзілістен кейін жағдай күрт өзгерді.
27-минутта Фрэнк Назар есеп ашса, 32-де Джексон Лакомб есепті еселеді. Бұдан кейінгі бес минутта Тейдж Томпсон, Мэттью Бенирс және Майкл Кессельринг бірінен соң бірі шайба соғып, Қазақстанның қорғанысын қопарып өтті.
46-минутта Зак Веренски АҚШ құрамасының алтыншы шайбасын енгізді. Қазақстан сапынан 60-минутта Владимир Волков мергендік танытты.
Бұл Қазақстан үшін қатарынан бесінші жеңіліс. Қазір құрамамыз В тобының турнирлік кестесінде үш ұпаймен жетінші орында тұр. Келесі шешуші ойын Швейцарияға қарсы өтеді. Кездесу сейсенбі, сағат 15:20-да басталады.
