"Барыстағы" бапкерлердің нақты міндеттері айтылды

Астаналық "Барыстың" бас бапкері Михаил Кравец командадағы жаттықтырушылар штабының міндеттері қалай бөлінгенін айтып, қазақстандық маман Талғат Жайлауовтың нақты немен айналысатынын түсіндірді.

"Барыстың" 2026/27 жылғы маусымдағы ресми штабында Жайлауов бас бапкердің ассистенті қызметін атқарады. Сонымен қатар Александр Савченков шабуылшыларға, Евгений Королев қорғаушыларға, ал Константин Барулин қақпашыларға жауап береді.

Талғат Жайлауов қарсыластың ойынын зерттейді

Кравецтің айтуынша, "Барыстағы" негізгі шешімдерді өзі қабылдайды. Ал әр көмекшінің матчқа дайындық кезіндегі жеке бағыты бар.

Талғат Жайлауовтың басты міндеттерінің бірі – алдағы қарсыластың ойынын алдын ала талдау. Кейін ол команда хоккейшілеріне қарсыласқа қарсы қалай әрекет ету керектігін түсіндіреді.

"Жұмыс үнемі менен басталады, соңғы шешімді де мен қабылдаймын. Талғат Жайлауов матч алдында қарсыласты қарап шығып, кейін жігіттерге не істеу керектігін түсіндіреді", – деді Кравец.

Штабтағы басқа мамандардың да міндеттері нақты бөлінген.

Александр Савченков шабуыл аймағындағы әрекеттерді талдайды және команда сан басымдығына ие болған кездегі ойынды пысықтайды. Сонымен бірге қарсыластың көпшіліктегі әрекетін де зерттейді.

Ал Евгений Королев қорғаныстағы ойынға жауапты. Оның міндетіне команда азшылықта қалған кездегі тактиканы дайындау да кіреді.

Михаил Кравец негізгі командалық жиналысты өзі өткізіп, қарсыласқа байланысты тең құрамдағы, яғни беске-бес форматындағы ойын жоспарын түсіндіреді.

"Барыс" маусымды 7:1 есебімен бастады

Астаналық клуб ҚХЛ-дың 2026/27 жылғы тұрақты чемпионатын ірі жеңіспен бастады. 7 қыркүйекте "Барыс Аренада" өткен кездесуде Михаил Кравец шәкірттері Новосібірдің "Сибирін" 7:1 есебімен жеңді. 

Келесі матчты "Барыс" 9 қыркүйекте өз алаңында Уфаның "Салават Юлаев" командасына қарсы өткізеді. Кездесу Қазақстан уақытымен 19:00-де басталады.