"Барыс" хоккей клубының негізгі қақпашысы Никита Бояркин ауыр жарақат алып, алдағы алты ай бойы мұз айдынына шыға алмайды.
Қақпашының агенті Шуми Бабаев спортшының Германияның Мюнхен қаласында операцияны сәтті жасатқанын мәлімдеді.
Ойыншы ақпан айының соңында “Ладаға” қарсы матчта алдыңғы крест тәрізді байламдарын зақымдап алған. Осы жарақатына байланысты Бояркин алдағы жарты жылда мұз айдынына қайта орала алмайды. Ол 2024 жылғы әлем чемпионатында Қазақстан құрамасының сапында өнер көрсете алмайды.
"Никита Бояркин Мюнхенде сәтті ота жасатты. Өкінішке қарай, оның қалпына келу мерзімі кемінде алты айға созылады. Осы себепті ол Қазақстан құрамасына әлем чемпионатында көмектесе алмайды", – деп жазды Бабаев өз Telegram-арнасында.
