Ауыр салмақтағы танымал ресейлік файтер Александр Емельяненко омыртқасына операция жасатқаннан кейін уақытша мүгедек арбасына таңылса да, мансабын аяқтауға ниетті емес.
Қазір 43 жастағы Емельяненко өздігінен қозғала алмайды. Дегенмен дәрігерлер ұсынған мүгедектік статусынан бас тартқанын ашық айтты.
“Дәрігерлер спортқа, әсіресе ММА-ға қайта оралмауды ұсынады. Мүегедектік алуға кеңес берді. Дәрігер: “Бұл — оңай рәсім, ал сен неге бас тартасың?” дейді. Не үшін? Мүгедектерге арналған тегін автотұрақ үшін бе? Әрине, мен бас тарттым. Мен қайта оралуым керек екенін білемін — міндетті түрде ораламын. Менде бәрі жақсы. Бұдан да қиын жағдай болған”, – деді спортшы.
29 наурызда Емельяненко блогер Артём Тарасовпен реванш өткізеді деп жоспарланған. Бірақ омыртқасындағы жарық салдарынан аяқтары жансызданып, жекпе-жектен бас тартуға мәжбүр болды.
Александр Емельяненко соңғы рет октагонға былтыр желтоқсанда шыққан. Ол NFL 2 турнирінде (Назрань) бірінші раундта-ақ Алексей Гончаровты нокаутпен жеңді.
