Қазақстандық велошабандоз Денис Сергиенко маунтинбайктен Азия чемпионатында күтпеген сенсация жасап, күміс медаль иеленді.
Азия чемпионаты Қытайдың Цзуньи қаласында өтіп жатыр. Жарыс барысында Қазақстан құрамасы өз қоржынына кезекті күміс медальды қосты. Олимпиадалық бағдарламаға кіретін кросс-кантри санатында Денис Сергиенко екінші орынға ие болды. Ал алтын мен қола жүлделер жергілікті, яғни Қытай спортшыларының еншісіне тиді.
Айта кетсек, осыған дейін Қазақстан құрамасы маунтинбайк кросс-кантри эстафетасында да күміс жүлде алған. Құрама сапында Богдан Лухманов, Алексей Фефелов, Денис Сергиенко, Виолетта Казакова, Юлия Ли және Алина Карасева өнер көрсетті.
Жалпы жарысқа 15 елден 160 спортшы қатысып жатыр. Бұл чемпионат Азиядағы маунтинбайк деңгейінің өскенін және қазақстандық спортшылардың құрлықтық аренада бәсекеге қабілетті екенін дәлелдеп отыр.
