Бұл мәлімдемені Халықаралық шаңғы спорты федерациясының (FIS) фристайл бойынша рейс-директоры Андреа Ринальди жасады. Ол Алматыда өткен жасөспірімдер арасындағы әлем чемпионатын жоғары бағалап, Қазақстанның жүйелі дамуы мен халықаралық әріптестігіне ерекше назар аударды.
Қазақстанның фристайл спорты әлемдік аренада жоғары бағаға ие болды. Халықаралық шаңғы спорты федерациясының (FIS) фристайл бойынша рейс-директоры Андреа Ринальди Туризм және спорт министрі Ербол Мырзабосыновпен кездесіп, Қазақстандағы қысқы спорт түрлерін дамыту және халықаралық ынтымақтастық мәселелерін талқылады.
Кездесу барысында тараптар Қазақстанда фристайлды – әсіресе могул және акробатикалық бағыттарды – жүйелі түрде дамыту қажеттігін атап өтті. Ринальди Алматыда биыл қаңтар айында алғаш рет өткен жасөспірімдер арасындағы әлем чемпионатының жоғары деңгейде ұйымдастырылғанын ерекше атап өтті.
Оның айтуынша, бұл чемпионат еліміздің фристайл спорты бойынша мүмкіндігін бүкіл әлемге паш еткен маңызды іс-шара болды. Әсіресе, жас спортшылар Дінмұхамед Райымқұлов пен Анастасия Городконың өнері ерекше әсер қалдырған.
Андреа Ринальди Қазақстанды фристайл спорты бойынша әлемнің үздік төрт елінің қатарына қосып отыр. Оның айтуынша, бұл нәтижелер кездейсоқ емес – мемлекет тарапынан көрсетілген жүйелі қолдау мен Қазақстан шаңғы спорты федерациясының Халықаралық ұйыммен тығыз әріптестігі нақты нәтижелер беріп жатыр.
«Қазақстанның фристайлдағы қазіргі орны – кәсіби басқару мен халықаралық стандарттарға сай дамудың нәтижесі. Біз ынтымақтастығымызды одан әрі нығайтуға дайынбыз», – деді FIS өкілі.
Министр Ербол Мырзабосынов өз кезегінде Мемлекет басшысының тапсырмасы аясында қысқы спорт түрлерін, оның ішінде фристайлды халықаралық деңгейде ілгерілетуге бар күш салынып жатқанын атап өтті.
Естеріңізге сала кетейік, 2026 жылғы Милан-Қортина қысқы Олимпиадасына 206 күн қалды.
