Шавкат Рахмоновтың отбасы Жамбыл облысындағы өлімге әкеп соққан жол апатына байланысты алғаш рет пікір білдірді. Апаттан оның келіншегі мен баласы зардап шеккен болатын. Бұл туралы Шавкаттың әпкесі, қоян-қолтық күрестен үш дүркін әлем чемпионы Сора Рахмонова Instagram желісінде жазды.
2025 жылдың 30 шілдесінде, Сора Рахмонова Stories бөлімінде былай деп жазды:
"Бауырымның отбасындағы жағдайға алаңдап, хабарласып жатқан барша жанға Алла разы болсын! Ондай жағдай ешкімнің басына келмесін. Ертең не боларын тек Жаратушы ғана біледі. Жеңгеме Алла жар болсын! Ол бірден екі жақынынан айырылып, өзі де жарақат алды".
Еске салсақ: Жамбыл облысында жол апаты салдарынан екі адам қаза тапты, ал Шавкат Рахмоновтың жұбайы мен ұлы түрлі жарақатпен ауруханаға түскен. Бұл жағдай қоғам назарын аудартып, жанкүйерлер мен жекпе-жек әлемінің өкілдері отбасына қолдау білдіруде.
