Қазақстанда спорт жүлдегерлеріне сыйақы беру тәртібі өзгерді

Жаңа ереже күшіне енеді

Жаңа тәртіп бойынша сыйақыға келесі жаттықтырушылар үміткер бола алады:

• Спортшыны бастапқы дайындық кезеңінде кемінде үш жыл жаттықтырған алғашқы бапкер;
• Ұлттық құрамаға кірмеген уақытта спортшымен жеке жұмыс істеген жеке жаттықтырушы;
• Командалық спорт түрлерінде (ойындар, эстафеталар, топтық және аралас жарыстар) оқу-жаттығу процесін ұйымдастырған бапкерлер;
• Ұлттық құраманың негізгі жаттығу жоспарына жауапты бас бапкер.

Сонымен қатар марапатқа үміткер спортшылар тізімі де кеңейді. Енді Олимпиада, Паралимпиада және Сурдлимпиада ойындарында 4, 5 немесе 6-орын иеленгендер, сондай-ақ олимпиадалық спорт түрлерінде әлемдік рекорд жаңартқандар да сыйақы ала алады.

Сыйақы қалай бөлінеді?

Жеке спорт түрлерінде:

• Алғашқы жаттықтырушы – сыйақының 10%;
• Жеке жаттықтырушы – 80%;
• Бас бапкер – 10%.

Егер бір маман бірнеше рөлді қатар атқарса, оның сыйақы үлесі қосылады.

Командалық спорт түрлерінде:

Әр орын үшін үш жаттықтырушы – бас бапкер және екі қосымша бапкер – марапатталады. Тек екі спортшыдан тұратын командаларға бұл ереже қолданылмайды. Үміткерлерді ұлттық спорт федерациялары жанындағы арнайы кеңес анықтайды.

Сыйақы төлеу тәртібі

• Төлем тек ұлттық деңгейде аккредиттелген спорт федерациялары арқылы жүргізіледі;
• Құжаттар жарыс аяқталғаннан кейін 10 жұмыс күні ішінде тапсырылуы қажет;
• Қаржыландыру республикалық бюджеттен және Үкіметтің ірі халықаралық жарыстарға арналған резервінен жүзеге асырылады;
• Сыйақы жарыс өткен күнгі валюта бағамы бойынша есептеліп, тікелей спортшылар мен бапкерлердің банктік шоттарына аударылады.