Футзалдан Қазақстан құрамасы Еуро-2026 чемпионатына жолдама беретін плей-офф кезеңіндегі алғашқы ойынын Италияға қарсы өткізді.
Қазақ футзалшылары ойынның көп бөлігінде басымдық танытып, жиі шабуылдады. Дегенмен алғашқы дәл соққыны алаң қожайындары жасады. 15-минутта Джованни Пульвиренти есеп ашты.
Екінші таймда Италия есепті еселей түсті. 29-минутта Юлио Де Оливейра таблодағы көрсеткішті 2:0-ге жеткізді. Қазақстан құрамасы намысты қолдан бермей, 32-минутта Шыңғыс Есенамановтың голымен есеп айырмасын қысқартты.
Осылайша алғашқы матч Италияның жеңісімен аяқталды. Енді 23 қыркүйекте Астанада өтетін жауапты ойын екі құрама үшін де шешуші сынақ болмақ. Қазақстан өз жанкүйерлерінің қолдауымен тарихи жеңіске жетуді көздейді.
