Михаил Шайдоров Денис Тен мемориалында қысқа бағдарламада жеңімпаз атанды

Әлем чемпионатының күміс жүлдегері 95.01 ұпай жинап, жарыстың аралық көшбасшысы атанды.

Екінші орынды Грузия спортшысы Ника Егадзе иеленді - 87.58 ұпай. АҚШ өкілі Джейсон Браун 86.61 ұпаймен үшінші нәтижені көрсетті.

Қазақстандықтар арасынан Диас Жиренбаев жетінші орынға табан тіреді (77.14), Никита Кривошеев - 16-шы (59.33), Олег Мельников - 17-ші орынға жайғасты (54.19).

Айта кетейік, еркін бағдарлама 4 қазанда өтеді.

Мемориал туралы

Денис Тен мемориалы – қазақстандық мәнерлеп сырғанаушы, Олимпиада жүлдегері Денис Теннің құрметіне ұйымдастырылатын халықаралық турнир.

Тарихы мен мақсаты:

• Мемориал алғаш рет 2019 жылы, спортшы қаза болғаннан кейін бір жыл өткен соң өткізілді.
• Негізгі мақсат – Денис Теннің есімін ұлықтау, оның спорттағы мұрасын сақтау және жас мәнерлеп сырғанаушыларға қолдау көрсету.
• Турнир жыл сайын өтетін дәстүрлі спорттық шараға айналып келеді.

Денис Тен Қазақстандағы мәнерлеп сырғанаудың дамуына зор үлес қосты. Оның мемориалы – тек спорт жарысы емес, мәдени-ағартушылық іс-шара ретінде де маңызы бар.

Дереккөз: Olympic.kz