Жобаның ресми бастамасы 11 қараша күні беріліп, салтанатты шараға ел президенті Шавкат Мирзиёев қатысты. Ол стадион іргетасына капсула қойып, нысанның құрылысына ресми түрде бастау берді.
Жаңа Янги-Ташкент стадионы халықаралық FIFA талаптарына толық сәйкес салынады.
Стадион 55 мың көрерменге арналған және Азия құрлығындағы ең заманауи спорттық нысандардың бірі болмақ.
Инфрақұрылым жобасы аясында футболшыларға арналған жаттығу алаңдары, спорттық академия және жанкүйерлерге арналған заманауи аймақтар қарастырылған.
Жаңа стадион тек ішкі чемпионаттарға емес, сонымен қатар U-20 футболшылар арасындағы 2027 жылғы әлем чемпионатын өткізуге де қолданылады.
Сонымен қатар нысан Өзбекстандағы жастар спорты мен футболдың дамуына ұзақ мерзімді серпін беретін маңызды инфрақұрылымдық жоба ретінде бағалануда.
Айта кетейік, қазір Орталық Азиядағы ең үлкен стадион — Ашхабадтағы “Олимпия”. Ол 45 мың көрерменге арналған.
Ал Янги-Ташкент аренасы іске қосылған соң, Өзбекстан жаңа аймақтық рекордтың иегері атанбақ.
