«Қайрат» футзал клубы Чемпиондар лигасының плей-офф кезеңіне тыңғылықты дайындық жүргізіп жатыр. Алматылықтар жаңа қақпашымен құрамды күшейтуді жоспарлап отыр.
Ақпарат көзіне сай, «Қайрат» Бразилия трансфер нарығында жұмыс бастап кеткен. Клуб басшылығы бірнеше ойыншымен келісімге жақындағанымен әзірге олардың есімдері жарияланған жоқ.
Дегенмен, алдын ала мәлімет бойынша бір жаңа ойыншы қақпашы позициясында ойнайды. Екіншісі — әмбебап алаң ойыншысы (бірнеше рөлді атқара алатын).
Жаңа голкипердің шақырылуы қазіргі негізгі қақпашы Жоао Паулоның ойын стилімен байланыстырылады. Дереккөздің айтуынша, оның аяқпен ойнауындағы мүмкіндігі шектеулі, шабуылға жиі қосылу компоненті де қазіргі модельге толық сай келмейді. Бұл факторлар команданың заманауи тактикасына ықпал етіп, тиімділікті төмендетуі мүмкін.
Ал екінші бразилиялық легионер «Қайраттан» кеткен Аргентина құрамасының бұрынғы ойыншысы Кевин Ариеттаның орнын толтыруға тиіс. Яғни, клуб құрамдағы бос позицияны функционалды футболшымен жабуды көздейді.
Еске салайық, «Қайрат» футзалдан Чемпиондар лигасының 1/4 финалына бельгиялық «Спортинг-Андерлехтпен» өткен матчтан кейін шықты.
5 желтоқсанда Алматыда өткен ойында қазақстандық клуб 5:3 есебімен жеңіске жетті. Бірінші таймнан кейін алматылықтар 1:2 есебімен ұтылып тұрғанымен үзілістен соң есепті теңестіріп, кейін қарсыласын тізе бүктірді.
Ширек финалда «Қайраттың» қарсыласы — Испанияның «Картахена» клубы. Бұл командалар бұған дейін де жолыққан: өткен маусымда алматылықтар испаниялық ұжымды жартылай финалда 3:2 есебімен ұтқан.
Алғашқы ойындар: 23 ақпан
Қарымта матчтар: 6 наурыз
Финалдық кезең: 8 және 10 мамыр, Италия, Пезаро қаласы
Жұп жеңімпаздары финалдық раундқа жолдама алып, турнирдің шешуші кезеңінде жүлдені сарапқа салады.
