Мальдив аралдарында волейболдан Орталық Азияның тұңғыш Чемпиондар лигасы жалғасып жатыр.
"Тұран" турнирдің алғашқы ойынында Шри-Ланкадан келген "Хирдараманиді" 3:0 есебімен ойсырата ұтқан. Одан кейін қазақстандық клуб алаң иелері "Вамконы" да қиналмай жеңді: 3:0 (25:21, 25:8, 25:8)
Осы нәтижеден кейін түркістандық команда А тобын бірінші орынмен аяқтады.
Турнир кестесіне сай "Тұран" 9 ақпанда жартылай финалда В тобының екінші командасымен кездеседі. Қарсылас әзірге нақты анықталған жоқ.
В тобында негізгі фаворит ретінде Иранның "Фулады" аталып отыр. Ал Өзбекстанның "Хумо" клубы екі рет жеңіліп, плей-офф мүмкіндігінен айырылды.
Қазіргі жағдайға қарағанда "Тұранның" келесі қарсыласы "Непал Полиса" мен жергілікті "Хураа Комьюнити" арасындағы ойыннан кейін белгілі болуы ықтимал.
Еске салайық, Орталық Азия Чемпиондар лигасында жеңіске жеткен команда өз еліне биыл AVC Чемпиондар лигасына (Азия волейбол конфедерациясы) қатысу үшін ресми квота алып береді. Яғни бұл турнир — жай ғана жүлде үшін емес, құрлықтық деңгейге шығатын нақты жолдама үшін өтуде.
