“Қаржыны алып қоямыз деп қорқытады”: Асаубаеваның анасы федерацияға ауыр айып тақты
Лиана Таңжарықова Қазақстан шахмат федерациясын қолдаған шахматшылардың ата-аналарына үндеу жасады. Оның айтуынша, кейбір ата-аналар ашық пікір білдіруге қорқады.
“Бәрі жақсы деп жазады, ал жеке хатта басқа әңгіме айтады”
Таңжарықова Instagram желісінде жариялаған видеосында жағдайға қатысты пікір білдірді.
“Адамдар пікірлерде бәрі жақсы, бәрі керемет, федерация бізге көмектесіп жатыр деп жазады. Ал жеке хатта бірден: ‘Біз басқаша жаза алмаймыз, өйткені федерация бізді жазалады, ескерту жасады, келісімшартты бұзамыз, қаржыландыруды алып қоямыз деді’ деп айтады”, – деді ол.
Ол мұндай жағдайдың өте өкінішті екенін атап өтті. Таңжарықованың пікірінше, ата-аналар балаларын қолдамаса, олардың үлкен биіктерге жетуі қиын.
“Бұл, әрине, өте мұңды әрі өкінішті жағдай. Бірақ сіздер балаларыңызға осылай қарасаңыздар, айтыңыздаршы, оларды қолдамасаңыздар, олар үлкен жетістікке жете ала ма?” – деді Бибісараның анасы.
Видео жазбасының астына ол “Қос стандарт” деп пікір қалдырған.
Федерацияға қатысты дау жалғасып жатыр
Бұған дейін Лиана Таңжарықова әлеуметтік желілерінде бірнеше видеоүндеу жариялаған еді. Онда Қазақстан шахмат федерациясы Бибісара Асаубаеваның қаржыландырылуына қатысты ақпаратты бұрмалап отыр деп мәлімдеген.
Сондай-ақ тұрақты төлемдердің болмауы және бюджетке қатысты манипуляциялар туралы айтқан.
Әзірге бұл мәлімдемелерге қатысты ресми тараптың толық жауабы немесе нақты шешімі жарияланғаны туралы ақпарат жоқ.