Бибісара Асаубаева беделді Titled Tuesday турнирінде жүлде иеленді
Қазақстандық шахматшы Бибісара Асаубаева әлемдегі ең беделді онлайн шахмат турнирлерінің бірі — Titled Tuesday жарысына қатысып, үздік нәтижемен көзге түсті.
Жүздеген мықтының арасында 31-орын алды
Бибісара турнир қорытындысы бойынша 11 мүмкін ұпайдың 7,5 ұпайын жинап, жалпы есепте 31-орынға тұрақтады. Жарысқа әлемнің әр түкпірінен жүздеген титулды шахматшы, соның ішінде гроссмейстерлер мен халықаралық шеберлер қатысты.
Сонымен қатар қазақстандық спортшы әйелдер арасындағы үздік нәтиже көрсетіп, бірінші әйелдер жүлдесін жеңіп алды. Бұл жүлденің көлемі — 100 доллар.
Жалпы есепте бірінші орынды ресейлік гроссмейстер Алексей Сарана иеленді. Ол 11 партияда 9,5 ұпай жинаған.
Бибісара нәтижесін әлеуметтік желіде бөлісті
Қазақстандық шахматшы өз ойынының қорытындысын әлеуметтік желідегі парақшасында жариялады.
"Титульникті өте ұзақ уақыттан кейін алғаш рет ойнадым. 31-орын, рейтингімді аздап көтердім және әйелдер арасындағы бірінші жүлдені алдым. Жалпы, жаман емес", — деп жазды Бибісара Асаубаева Telegram-арнасында.
Titled Tuesday қандай турнир?
Titled Tuesday — Chess.com платформасында әр сейсенбі сайын өтетін ең танымал әрі беделді тұрақты онлайн шахмат турнирлерінің бірі. Бұл жарысқа кез келген әуесқой ойыншы қатыса алмайды.
Турнирге тек ресми халықаралық атағы бар шахматшылар жіберіледі. Олардың қатарында:
- гроссмейстерлер;
- халықаралық шеберлер;
- ФИДЕ шеберлері;
- басқа да титулды ойыншылар бар.
Әр апта сайын турнирде ақшалай сыйақы сарапқа салынады. Жүлде жалпы есептегі үздік шахматшыларға ғана емес, әйелдер арасындағы үздік нәтиже көрсеткен ойыншыларға да беріледі. Осы жолы дәл осы номинациядағы бірінші жүлдені Бибісара Асаубаева жеңіп алды.