Бибісара Асаубаева тағы бір фаворитті жеңіп, Norway Chess турнирінде лидерлігін сақтады
Қазақстандық шахматшы Norway Chess Women-2026 турнирінің төртінші турында сәтті өнер көрсетіп, жалпы есептегі бірінші орнын сақтап қалды.
Асаубаева бұл жолы әлемнің қазіргі чемпионы қытайлық Цзюй Вэньцзюньге қарсы ойнады. Негізгі партия тең нәтижемен аяқталғаннан кейін шахматшылар армагеддон форматында қосымша ойын өткізді. Қосымша кездесуде Асаубаева қарсыласын 6 минут 23 секунд ішінде жеңді. Осылайша қазақстандық шахматшы 1,5 ұпай еншілеп, турнирдегі жалпы көрсеткішін 7 ұпайға жеткізді.
Турнир кестесіндегі жағдай
Төрт турдан кейін Дивья Дешмух, Анна Музычук пен Чжу Цзиньэр 5,5 ұпай жинады. Ал ерлер арасында франциялық шахматшы Алиреза Фирузджа армагеддондағы алғашқы жеңілісіне қарамастан 8,5 ұпаймен көшбасшылық шыңда қалды.
Бұған дейін қазақстандық гроссмейстер алғашқы турда үндістандық Хампи Конеруді жеңген еді. Екінші турда қытайлық Чжу Цзиньэрді армагеддонда ұтса, үшінші кезеңде Дивье Дешмухқа қосымша көрсеткіштер бойынша жол берген болатын.