Канье Уэсттың концертінен кейінгі Орталық стадион алаңының жағдайы көрсетілді (ВИДЕО)

Стадион көгалы арнайы жабынмен қорғалған

Бейнежазба авторының айтуынша, концерт кезінде футбол алаңының шөбі арнайы материалмен жабылған. Кадрлардан көгалдың үстіндегі қорғаныш жабындысының алынып жатқаны және стадионда демонтаж жұмыстары әлі жалғасып жатқанын көруге болады.

Автор алаң ұзақ уақыт жабық тұрғандықтан, көгалдың сыртқы көрінісі өзгергенін атап өтті.

“Газонды осындай арнайы жабынмен жауып қойған. Көгал жылыжайда тұрғандай болып қалыпты. Енді оны суаратын шығар. Қазір мұнда демонтаж жұмыстары әлі жүріп жатыр, стадионның ішінде де, сыртында да адам көп”, – дейді видео авторы.

“Қайрат” концерттің кесірінен Алматыда ойнаған жоқ

Еске салайық, америкалық рэпер Канье Уэсттың Алматыдағы концертіне байланысты “Қайрат” маңызды еурокубок кездесуін Орталық стадионда өткізе алмады. Алматылық клуб Чемпиондар лигасының үшінші іріктеу кезеңінде болгариялық “Левскиге” қарсы қарымта матчты Түркістанға ауыстыруға мәжбүр болды.

Концерттен кейін Орталық стадион газонының жағдайы футбол жанкүйерлерінің назарын аударып отыр. Әлеуметтік желіде тараған видео алаңды қалпына келтіру жұмыстарының қаншалықты жылдам жүргізілетініне қатысты талқылауға себеп болды.