Қазақстан әлем чемпионатын 13:1 есебімен бастады

Азамат Сейфуллин покер жасады

H тобының бірінші турында Қазақстан құрамасы Иракпен кездесіп, 13:1 есебімен басым түсті.

Матчтың басты қаһарманы Азамат Сейфуллин болды. Ол қарсылас қақпасына төрт гол соқты. Анарбек Мелісбек пен Ержан Жарлығағанов екі реттен мергендік танытты.

Қазақстан сапындағы өзге голдарды Ғалым Райханов, Төрехан Досов, Александр Сергейчук, Диас Егінжанов және Олжас Тайбасаров соқты.

Қазақстан – әлемдік рейтинг көшбасшысы

Қазақстан құрамасы әлем чемпионатына әлемдік рейтингтің бірінші нөмірі әрі Еуропаның қазіргі вице-чемпионы мәртебесінде келді. Иракқа қарсы нәтижелі ойын ұлттық команданың турнирдегі басты фавориттердің бірі екенін тағы бір мәрте көрсетті.

Қазақстан құрамасы топтық кезеңдегі екінші матчын 30 тамызда Түркияға қарсы өткізеді.

H тобында Қазақстан, Ирак, Түркия, Бельгия және Гаити құрамалары өнер көрсетіп жатыр. Топтағы тағы бір кездесуде Түркия мен Бельгия 2:2 есебімен тең түсті.