Бұл туралы тиісті министрліктің баспасөз қызметі хабарлады.
Қазақстан Республикасының Туризм және спорт министрлігі облыстық спорт басқармаларының басшыларын тағайындау бойынша арнайы комиссия құрды. Бұл туралы аталған ведомствоның баспасөз қызметі хабарлады.
Қазақстан Президенті Қасым-Жомарт Тоқаевтың тапсырмасынан кейін өңірлік спорт басқармаларының басшыларын тағайындау құқығы Туризм және спорт министрлігіне берілді.
Арнайы комиссияны министр Ербол Мырзабосынов басқарады.
«Облыстық спорт басқармалары басшылары лауазымына үміткерлер кәсіби тәжірибесі, басқарушылық қабілеті, коммуникативтік дағдылары, стратегиялық ойлау және моральдық-этикалық қасиеттері сияқты бірқатар критерийлер бойынша бағаланады. Үміткерлерді ұсынуды жергілікті атқарушы органдар мен министрлік қана емес, сондай-ақ азаматтардың өздері де жүзеге асыра алады», — делінген министрліктің хабарламасында.
Жаңа комиссия өз жұмысын бастап, Павлодар, Қарағанды және Түркістан облыстарындағы спорт басқармаларының жаңа басшыларын тағайындады.
