Қазір спортшыларымыз қызу дайындық үстінде.
Қазақ биатлоншылары Финляндияда өтетін әлем кубогы кезеңіне дайындалып жатыр. Суоми еліндегі шаңғышы мергендер сайысы 30-шы қарашада басталады. Қазір ұлттық құрама сапында 9 спортшы жүр. Олардың арасында Әсет Дүйсенов, Александр Мухин, Арина Крюкова және Галина Вишневская секілді ел үздіктері бар.
Биатлоншы қыз-жігіттер Еуропада мықтылармен бірге айдан аса оқу-жаттығу жиынын өткізді. Енді дайындықтың нәтижесін көрсету керек. Жаңа маусымда жарыс ережесіне біршама өзгерістер енгізілген. Мысалы, спринтерлік сайыс пен жекелей сында әлем кубогының жалпы есебінде үздік 15-ке енген спортшылар жарысты өзгелерден кеш бастайды. Биылғы әлем кубогы тоғыз кезеңнен тұрады.
