Дүниежүзілік бокс кеңесінің (WBC) президенті Маурисио Сулейман өзінің әлеуметтік желідегі парақшасында Мұса Әбідрайымның батылдығы туралы хабарлап, оны WBC бейбітшілік елшісі атағымен марапаттағанын мәлімдеді.
Маурисио Сулейман қазақ боксшысы Әлихан Жарылқапов арқылы Мұса Әбдірайыммен телефон арқылы байланысып, оның ерлігіне жоғары баға берді.
"Мұса – тек спорт үшін ғана емес, бүкіл адамзат үшін нағыз батыр", — деп атап өтті WBC басшысы.
Оның айтуынша, Мұса Әбдірайым ерекше батылдық танытып, шапшаң реакциясы мен қорықпай жасаған әрекеті арқылы шынайы қаһармандықтың үлгісін көрсетті.
Еске сала кетсек, кеше Алматы халықаралық әуежайында ер адам қолына пышақ алып, әуежай қызметкерін кепілге алған болатын.
Оқиға орнында болған қоңыр түсті поло киген азамат қаскөймен келіссөз жүргізіп, өзін кепілге алуды ұсынған. Сәті түскенде, ол қылмыскердің қолындағы пышақты жұлып алып, полицияға оны ұстауға көмектесті.
Бұл ерлігі үшін ҚР президенті Қасым-Жомарт Тоқаев батыр азаматты мемлекеттік наградамен марапаттауды тапсырды.
