Ұлыбританиялық төрт үстел теннисшісі келісілген матчтарға қатысы бар деген күдікпен ресми түрде жарыстардан шеттетілді. Бұл туралы Англия үстел теннисі қауымдастығының (TTE) баспасөз қызметі мәлімдеді. Тергеудің басталуына британдық букмекерлік кеңселерден алынған мәліметтер себеп болған.
Ұлыбританияның Құмар ойындар жөніндегі комиссиясы (UKGC) жүргізген тергеу нәтижесінде төрт спортшының келісілген матчтарға қатысқаны дәлелденді. Букмекерлік компаниялар ұсынған мәліметтер аясында күдікті бәс тігу әрекеттері тіркеліп, олардың кейбірі спортшылармен байланысты болуы мүмкін екені анықталған.
Аталған теннисшілер Англия үстел теннисі қауымдастығынан (TTE) ресми түрде шеттетілді және қауымдастық аясында өтетін барлық турнирге қатысу құқығынан айырылды. Сонымен қатар спортшыларға 2025 жылғы 8 сәуірге дейін апелляция беру құқығы қалдырылды.
UKGC бас директоры Эндрю Роудстың айтуынша, бұл жағдай спорттағы адалдықты сақтау үшін халықаралық деңгейде бірлесіп жұмыс істеудің маңыздылығын көрсетеді:
"Соңғы бес жылда әртүрлі елдердің тиісті ұйымдары келісілген матчтармен күрес жолында бірігіп әрекет етті. Бұл істің ашылуы — сондай ынтымақтастықтың жемісі", — деді ол.
