АФК "Қайраттың" бас бапкері Марлон Веласко биылғы маусым аяқталғаннан кейін клубтан кетуі ықтимал. Испаниялық басылымдардың мәліметінше, ол өз еліне оралып, жергілікті командалардың бірін баптауға ниетті.
Алматының футзал клубы маусым соңында елеулі өзгерістерге тап болуы мүмкін. Клуб президенті Кайрат Оразбеков бұл жағдайға қатысты нақты пікір білдірді.
"Марлон Веласконың "Қайратпен"келісімі маусым соңына дейін жарамды. Қазір келісімді ұзарту туралы әңгіме болған жоқ. Бұл мәселені кейінірек егжей-тегжейлі талқылаймыз. Ең бастысы – команда Чемпиондар лигасының "Төртеудің финалы" мен Қазақстан чемпионатының плей-офф кезеңіне тыңғылықты дайындалуы тиіс", – деп мәлімдеді.
Клуб басшысы сондай-ақ бразилиялық қақпашы Деннистің де командадан кету ықтималдығы жоғары екенін растады. Бұған дейін испаниялық "Пальма" клубының оған қызығушылық танытқаны туралы сыбыстар тараған еді.
"Деннистің болашағына келсек, өкінішке қарай оның кету ықтималдығы расымен де жоғары. Бірақ бұл шешімнің артында тек спорттық емес, жеке өміріне байланысты факторлар да бар", – деді Оразбеков.
Айта кетейік, Деннис Қазақстан құрамасының болашақтағы ойыншысы ретінде қарастырылған. Егер ол "Қайратта" қалса, келер жылы Қазақстан азаматтығын алып, ұлттық құрама сапында өнер көрсетуге мүмкіндік алар еді. Бірақ Испанияға ауысқан жағдайда бұл мүмкіндік жойылады.
