Ол Павлодарда Ұлттық ұлан сарбаздарына шабуыл жасаған.
Еркін күрестен Олимпиада ойындарының қола жүлдегері Дәулет Шабанбай Павлодар қаласында Ұлттық ұлан әскери қызметшілеріне шабуыл жасау ісі бойынша 3 жылға бас бостандығынан айырылды.
«Қазинформ» мәліметі бойынша, сот шешімімен ол жазасын орташа қауіпсіздік деңгейіндегі түзеу мекемесінде өтейтін болды.
Айта кетейік, спортшыға Қазақстан Республикасы Қылмыстық кодексінің 380-бабы 4-бөлігі 1-тармағы — «Екі немесе одан да көп адамға қатысты билік өкіліне күш қолдану» бойынша айып тағылған болатын.
Дәулет Шабанбай еркін күрестен Қазақстан атынан халықаралық жарыстарда өнер көрсеткен. Ол Павлодар облысының намысын қорғады. Балуан спорттық мансабын бес жыл бұрын аяқтады. Сол жылы Қазақстан чемпионатында екінші орын алған болатын.
Ал 2012 жылы Лондонда өткен Жазғы Олимпиада ойындарында Дәулет Шабанбай бастапқыда бесінші орынға иеленген еді. Кейіннен жүлдегер атанған екі спортшы допинг қолданғаны үшін дисквалификацияланып, нәтижесінде қола жүлде Шабанбайға берілді.
