Криштиану Роналдудың бұрынғы сүйіктісі күтпеген шындықты жария етті.
Танымал британдық радиожүргізуші әрі модель Джемма Аткинсон Криштиану Роналдумен қарым-қатынасы аяқталғаннан кейін өзіне футболшы туралы жағымсыз пікір білдіру үшін қомақты қаржы ұсынылғанын мәлімдеді.
Оның айтуынша, ажырасудан соң сары басылымдар Роналду жайлы теріс ақпарат таратуға үгіттеп, ақша ұсынған. Алайда Аткинсон бұған келіспеген.
"Біз айырылысқаннан кейін ол туралы жаман айтуым үшін көп ақша беруге дайын болды. Бірақ мен одан бас тарттым. Себебі Криштиану туралы айтар ешқандай жаман сөзім жоқ еді әрі оған негіз де болмады", – деді ол Key 103 радиосына берген сұхбатында.
Аткинсонның сөзінше, олардың қарым-қатынасы 2007 жылдың қазан айында, Роналду "Манчестер Юнайтед" сапында ойнап жүрген кезде, өзара келісіммен және дау-дамайсыз аяқталған. Төрт айға созылған байланыс барысында футболшы оған әрдайым құрметпен қарағанын модель бірнеше мәрте атап өткен. Соған қарамастан, таблоидтар ажырасу оқиғасын "сатуды" ұсынып, түрлі келісімдер жасағысы келген, бірақ ол мұндай ұсыныстардың бәрінен бас тартқан.
Қазіргі таңда Криштиану Роналду Сауд Арабиясының "Әл-Наср" клубында өнер көрсетіп жүр. 2016 жылдан бері ол испаниялық модель Джорджина Родригеспен бірге. Ерлі-зайыпты бес баланы тәрбиелеп отыр: екеуі Джорджинадан дүниеге келсе, үшеуі суррогат ана арқылы туған.
