Қазақстандық кәсіпкер Дінмұхамед Сыздықов теннисші Елена Рыбакинаға қазақтың ұлттық киімі — қамзол сыйға тартты. Спортшының сыйлықты қабылдаған сәттегі реакциясы видеоға түсіріліп, әлеуметтік желіде жарияланды.
Дінмұхамед Сыздықов Instagram парақшасына Рыбакинамен түсірілген видеоны жүктеген. Ол бұл сыйды теннисшінің Дубайдағы турнирге қатысқан кезінде табыстауға мүмкіндік алған.
Кадрлардан Рыбакинаның жанкүйерлерге қолтаңба таратып тұрғанын көруге болады. Сол сәтте Сыздықов спортшыға камзол алып келгенін айтып, сыйлығын ұсынған.
Теннисші сыйлықты жылы қабылдап, күлімсіреп алғыс айтқан. Артынша қамзолды киіп көру-көрмеу керегін нақтылап, сыйлықты киіп көргені де видеода байқалады.
Дінмұхамед Сыздықов көпшілікке танымал спорт және шоу-бизнес жұлдыздарына қазақы ұлттық киімдерді сыйға тартумен белгілі. Ол мұндай видеоларды әлеуметтік желіде жиі бөлісіп отырады.
Еске сала кетейік, бұған дейін Сыздықовтың Дженнифер Лопеске де қазақы қамзол сыйлағаны туралы ақпарат тараған еді.
