Қазақстанның танымал мәнерлеп сырғанаушысы Элизабет Тұрсынбаева әлеуметтік желідегі парақшасында соңғы күндері болған үш маңызды жеке оқиғасын айтып берді.
Спортшы алдымен жоғары білім туралы дипломын қолына алғанын жазды.
Элизабеттің айтуынша, диплом алу сәті жақында ғана болған, ал салтанатты рәсім мамыр айында өтпек. Сондай-ақ ол әзіл-шыны аралас:
“Маған қызыл түс жарасады, сондықтан дипломым да, әрине, қызыл”, – деген мағынада жазба қалдырған.
Диплом қуанышы жүргізуші куәлігін алуымен тұспа-тұс келген. Тұрсынбаева бұл жаңалықтарды туған күнімен бірге үйдегідей жылы атмосферада атап өткенін айтып, ақпан айын “қарбалас әрі көңілді өтті” деп сипаттаған.
“Осындай мазмұнды ақпан болды”, – деп түйіндеген спортшы.
Элизабеттің спорттағы мол тәжірибесін ескерген жанкүйерлер арасында бір мәселе қызу талқыға түскен. Әлеуметтік желідегі пікірлерге қарағанда, 17 және 19 ақпанда Миланда өткен әйелдер арасындағы мәнерлеп сырғанауды отандық телеарналардың ешқайсысы Тұрсынбаеваны қонақ-эксперт, комментатор ретінде шақырмағанына наразы болғандар бар.
Threads қолданушыларының бірі “Элизабет сияқты тәжірибелі спортшы жарыс барысын кәсіби тілмен түсіндірсе, эфир әлдеқайда қызық әрі пайдалы болар еді”, – деген пікір қалдырған.
Кей көрермендердің ойынша, мұндай шақыру Қазақстан делегациясының имидждік деңгейін көтерер еді және арналардың бірінің рейтингке ықпал етуі мүмкін.
Ашық дереккөздерде Элизабет Тұрсынбаеваның спорттық жолы Ресейде басталғаны, кейін отбасы шешімімен Қазақстан атынан өнер көрсеткені айтылады. Ол Этери Тутберидзе штабының жүйесінде жаттығып, халықаралық ареналарда бірқатар тарихи нәтижелерге қол жеткізген спортшы ретінде танылады.
