Павлодарда жас қызды ұрған жаттықтырушы жазасын алды
Павлодарда волейбол турнирінде жас спортшы қызға қол көтерген жаттықтырушыға қатаң жаза қолданылды.
Турнир кезінде не болды?
Qumash_kz Telegram арнасының мәліметінше, оқиға Павлодарда ұйымдастырылған жекеменшік волейбол турнирінде болған.
Жарыс барысында шымкенттік волейбол клубының жаттықтырушысы Хамит Мырзабеков жас спортшы қызды ұрған. Оқиға туралы ақпарат әлеуметтік желілерде тарады.
Қазақстан волейбол федерациясы аталған жағдайдың 26 қазанда Павлодарда болғанын мәлімдеді. Федерация өкілдерінің түсіндіруінше, жарысты ұйымдастырған жекеменшік волейбол лигасының ұлттық федерацияға қатысы жоқ.
Жаттықтырушы қандай жаза алды?
Жарияланған ақпаратқа сәйкес, Хамит Мырзабековке қатысты тәртіптік шара қабылданған. Ол екі жыл мерзімге жарыстарға қатысудан шеттетілді.
Бірақ маманның жұмыстан босатылмағаны атап өтілді. Яғни екі жылдық шектеу оның жарыстарға қатысуына қатысты қолданылған.
Оқиғадан кейін жауапкершілік тек жаттықтырушыға жүктелген жоқ. Турнирді ұйымдастырған тарапқа тиісті бақылауды қамтамасыз етпегені үшін қатаң сөгіс жарияланып, айыппұл салынды.
Сонымен қатар Шымкенттегі волейбол академиясына да сөгіс берілді.