Қазақстандық жас спортшы Амир Омарханов ATP рейтингінде жеті саты жоғарылап, мансабындағы ең үздік нәтиже – 915-орынға көтерілді.
Қазақстандық жас теннисші Амир Омарханов кәсіби мансабындағы ең жоғары көрсеткішке қол жеткізді. Sports.kz порталының хабарлауынша, ATP жаңартқан рейтингке сәйкес, 17 жастағы спортшы жеті саты жоғарылап, 915-орынға көтерілді. Бұл – Амир үшін қазіргі уақытқа дейінгі ең үздік нәтиже.
Омарханов жақында Италияда өткен ITF M15 сериялы турнирінде өнер көрсетіп, бұған дейін Париждегі жасөспірімдер арасындағы "Ролан Гаррос" турниріне де қатысқан болатын. Бұл бәсекелер оның кәсіби өсуіне және рейтингтегі ілгерілеуіне үлкен ықпал етті.
ATP рейтингінде алға жылжыған тағы бір қазақстандық – Александр Шевченко, ол қайтадан ТОП-100-дікке еніп, 97-орынды иеленді. Сонымен қатар Бейбіт Жукаев та өз позициясын жақсартып, 244-сатыға тұрақтады.
