Қазақстандық теннисші Александр Бублик (ATP рейтингінде – 16-орын) Австрия астанасы Венадағы ATP 500 турнирінде жеңісті сериясын жалғастырып келеді.
Бублик турнирдің 1/8 финалында аргентиналық Франсиско Серундоломен (21-орын) кортқа шықты. Матч небәрі 1 сағат 6 минутқа созылып, қазақстандық теннисші екі сетте де қарсыласынан басым түсті — 6:4, 6:2.
Бұл жеңіс Бубликтің Вена турниріндегі екінші сенімді нәтижесі болды. Бұған дейін алғашқы айналымда чилилік Алехандро Табилоны (75-орын) 6:4, 6:4 есебімен жеңген.
2025 жылғы Вена турнирінің жалпы жүлде қоры — 2 736 875 еуро. Ал жеңімпаз 511 835 еуро мен 500 рейтингтік ұпайды иеленеді.
Айта кетейік, былтырғы турнирдің чемпионы — британдық Джек Дрейпер (қазіргі таңда әлемдік рейтингте 9-орында).
Енді Бублик ширек финалда Янник Синнер мен Флавио Коболли арссындағы жеңімпазбен кездеседі.
