Михаил Кукушкин Челленджер турнирінің ширек финалына шықты

Қазақстандық теннисші, әлемдік рейтингте 298-орында тұрған Михаил Кукушкин Ұлыбританияның Ноттингем қаласында өтіп жатқан челленджер турнирінің ширек финалына жолдама алды.

Жарыстың алғашқы айналымында Кукушкин арнайы шақыртумен қатысқан, рейтингте 441-сатыдағы 19 жастағы франциялық Малиж Маэні сенімді түрде жеңді — 6:3, 6:0.

Екінші кезеңде қазақстандық спортшы әлемдік рейтингте 368-орындағы германиялық Кристоф Негритумен кездесті. Бұл ойында да Михаил айқын басымдық көрсетіп, матчты 6:2, 6:1 есебімен аяқтады.

1 сағат 22 минутқа созылған кездесуде Кукушкин 4 эйс жасап, 11 брейк-пойнттың бесеуін тиімді пайдаланды. Ал Негриту небәрі 3 эйс орындады.

Жартылай финал жолдамасы үшін Михаил Кукушкин америкалық Кэннон Кингсли мен ұлыбританиялық Элистор Грей арасындағы матчтың жеңімпазымен күш сынасады.