"Бәрін жасауға тырысамын". Рыбакина әлемнің бірінші ракеткасы атануға қатысты ойын бөлісті

Қазақстанның бірінші ракеткасы Елена Рыбакина Canadian Open-2026 турниріндегі финалдан кейін әлемдік рейтингтегі жағдайына қатысты сұраққа жауап берді. Торонто турниріндегі табысты ойынынан кейін ол WTA көшбасшысы Арина Соболенкоға айтарлықтай жақындай түскен еді.

Олардың арасындағы айырма 354 ұпайға дейін азайған. Егер Рыбакина Canadian Open-2026 турнирінде чемпион атанса, ол Соболенкодан небәрі төрт ұпайға ғана қалып қояр еді.

"Мен үшін бұл, әрине, көп нәрсені білдірер еді. Сіздер мені рейтингте бірінші орынға өте жақын деп айтқанмен, маған ол әлі де өте алыс сияқты көрінеді. Мен бұл туралы көп ойламаймын", — деді Рыбакина.

"Бәрі тек маған байланысты емес"

Қазақстандық теннисші рейтингтегі күрес тек өзінің нәтижесіне ғана тәуелді емес екенін атап өтті.

"Біз турнирлерде ойнауды жалғастырып жатырмыз. Сондықтан бәрі тек маған ғана емес, басқа теннисшілердің нәтижесіне де байланысты", — деді ол.

Рыбакина бала кезінде кәсіби теннисте дәл осындай деңгейге жететінін күтпегенін айтты. Сонымен қатар, әлемнің бірінші ракеткасы атану үшін бар күшін салатынын жеткізді.

"Мен бұл үшін қолымнан келгеннің бәрін жасауға тырысамын. Бір күні бұл болады деп үміттенемін", — деді ол.

Финалда Швёнтекке жол берді

Еске салайық, Canadian Open-2026 турнирінің финалында Елена Рыбакина Польша өкілі Ига Швёнтекпен кездесті.

Әлемдік рейтингте сегізінші орында тұрған Швёнтек қазақстандық теннисшіні екі сетте жеңді. Матч 6:2, 6:3 есебімен аяқталды.