Әлемдік рейтингте алтыншы нөмірге ие Елена Рыбакинаның бұрынғы бапкері Стефано Вуков WTA жарыстарынан уақытша шеттетілді. Оның теннисшіге қатысты тәртібі тергеліп жатыр.
Рыбакина осы аптада 2022 жылы өзінің Уимблдонды жеңуіне еңбек сіңірген Стефано Вуковтың командаға оралғанын мәлімдеген еді.
Бірақ WTA қазір 37 жастағы хорват жарыстардан шеттетілгенін хабарлады. Бұған оның WTA-дің ар-намыс Кодексін бұзуы себеп.
Вуковтың тергеуге алынуына себеп болған шағым Рыбакинадан немесе әлдебіреуден түскені беймәлім. Ал Стефано өз тарапынан заңбұзушылықтарды жоққа шығаруда.
Уақытша санкция бойынша Вуков WTA жарыстарына аккредитация алудан құр қалады және ойыншыларға рұқсат етілген арнайы аумақтарға кіре алмайды (оның ішінде жаттығу корттары, өзге де жаттығу алаңдары мен мейрамханалар бар).
Вуков Рыбакинаны бойжеткен кезінен бері жаттықтырып келеді. Қазақстандық теннисшінің WTA Tour-дағы жетістіктері тікелей осы маманмен байланысты. Олардың әріптестігі былтырғы US Open қарсаңында үзілді. Қазір Рыбакинаның жаңа бапкері Горан Иванишевич саналады.
